Woihprogram Kurzfossung

Wean aundas – KPÖ, Piraten, Echt Grün und Unabhängige (Kurzbez.: ANDAS)
Schadinagossn 3 im 17ten

Mia san jetzat scho 1,8 Millionan Leit in Wean – owa net olle davo haum de gleichn Rechte. Mia mechatn gean a Wean mit gleiche Rechte und Chancen fia olle, a Stodt, in dea a jeda ohne Aungst aundas sei kaunn.

Oisdaunn – des do waratn unsare Foadarungan fiar a aundares Wean:

1. Soziale Obsicherung fia olle Leit – fia a bedingungsloses Grundeinkommen
Fost 400.000 Leit lebn in Wean in Oamut oda san oamutsgefährdet, und zwoa oft, obwohl s‘ eh hackln gengan. Ois easta Schritt auf‘m Weg zu an bedingungslosen Grundeinkommen muass de Mindestsicherung iwa da oamutsgrenzn auszoit wean. Und aa de Mindestpension muass hecha wean. Und mia woin Oabeits- und Sozialanwälte, fia de ma nix brennan muass. Und gegn des Bettelverbot samma aa.

2. Olle soin mitreden deafn – a Mensch, a Stimm
A Viertl vo de Leit, de in Wean lebn und Steian brennan, deafn bei de National- oda de Gemeinderatswoihn net mitmochn. Des is ungerecht! Zwegn dem valaungan ma a „Residenzbürgerschaft“, damit olle leit mitredn und wöhn deafn. Des undemokratische Hindanis von 5 Prozent muass wegga, damit aa wiaklich a jede Stimm gleich vü zöht.

3. Frauenrechte san Menschenrechte
D´Weiberleit vadienan aa ois Aungstöte vo da Gmoa weniga ois d´Maunaleit. De Kerzlschlucker haum a Problem mit‘m Recht vo de Fraun auf ian Körpa. Mia foadan an unabhängigen Fraunrot vo da Stodt, Schwaungaschoftsobbruch umasunst und Schutzzonen rund um Ambulatorien, gleiches Göd fia gleiche Oabeit, a Quotenregelung im Gemeindedienst und a Frauenförderung in da Politik, im Rathaus und in die Bezirk.

4. Her mit‘m schenan Lebn – Hackln muass si wieda auszoihn
Imma mea Leit haum ka fixe Hockn und kumman mit da Marie nimma aus. De Gmoa is a gaunz a schlechts Beispü dafia. Mia foadan a Oabeitszeitvakiazung auf dreissg Stund bei volla Bezohlung, mindestens zwöf Euro in da Stund und aa de Auswärtign, wuascht wohea s‘ san, soin hackln deafn.

5. Gscheide Wohnungen fia olle Leit!
Wohnan is in Wean kaum mea zum Dazoihn. Aa de Gemeindewohnungen san teia und bei de Betriebskostn kennt si sowieso kana aus. Drum woi ma, dass fia laare Wohnungen wos zoiht wird und dass mit ana Hugo-Breitner-Steia wieda gscheide Gemeindebautn baut wean. Und de miassn so vagebn wean, dass si a jeda auskennan tuat. Aussadem miassn aa alternative Wohnfoaman a Föadarung kriagn.

6. De Stodt gheat uns
Immer mea vo de schenan Platzln zum Ausrostn und Sinniern wü si wea untan Nogl reissen, dass ar damit a Gschäft mochn kaunn. Mia woin des net und valaungan, dass de öffntlichn Platzln gschützt wean vua de gaunzn Spekulantn!

7. A duachsichtiche Politik stott duachsichtiche Leit
De do obn packln hinta zuagmochte Tian, owa uns tan s‘ dafia ollarweu und iwaroi kontrolliern. Des woima owa ned! Mia valaungan, dass des aufheat und mia ollas seng kennan, wos si de untaranaunda ausmochn tan – und mi woin dabei aa mitreden kennan.

8. Büdung, Wissnschoft und Kuitua fia olle
Bei de Schuin tans de Marie kiazn und de Lehra soin owa no mea hackln! Dabei is no ollarweu aso, dass dei Herkunft ausmocht, wos d‘ leanan deafst. Mia foadan fia Wean de Gesamtschui, dass de Lehra wieda wos götn und fia olle an leichtaren Zuagaung zua Wissnschoft und zua Kuitua!

9. Naa zua Zwaaklassnmedizin
Leida is des in unsara Stodt scho gaunz normal, dass si‘s de Gstopftn beim Dokta und im Spitoi richten kennan. So geht des ned! Mia valaungan a solidarisches Gsundheits- und Pflegesystem mit multiprofessionelle Teams und a aunständigs Geaschtl fia olle, de wos duatn hackln tan.

10. Stroßn zum Lebn und Schwoazfoahn fia olle Leit
De Autos gengan uns imma mea aum Zaga – de mochn vü Lärm und Dreck und mia wean kraunk davo. Mia valaungan Schwoazfoahn fia olle, a gscheide Bim, a S-Bahn rund um Wean und dass no vü mea Stodt-Radln gibt.

11. Des „Tüterl“ gheat legalisiert
Des Vabot vom guaden Stoff kost an Haufn Marie und bringt sowieso nua a unnediche Hockn fia de Kiwara. Mia valaungan, dass da „Ofn“ ealaubt wiad, owa aa, dass iwa Drogn uandlich aufklärn tan.

12. So sei kennan wia ma is
Leit, de wos aus da Reih taunzn tan, wean oft vo da Seitn bled aungmocht. Mia woin, dass Wean da vuan dabei is. In Wean soi si kana de Goschn zarreissn iwa an, nua weu dea aundas is. In Wean soin de Rechte vo da Natua und vo oim, wos drin lebt – Leit und Viecha – wichtich sein!

Und zum Obschluss no wos: Mia wissen eh, dass no vüle aundare Sochn gawat, mit de ma uns ogebn miassn. Owa waunn mia east amoi im Rathaus drin san, wea ma si – zsaumman mit eich – drum kümman. Aussadem glaub ma, dass des Wiatschoftssystem bei uns da Grund dafia is, dass do bei uns so vüle Probleme gibt. Drum woima mit unsara Politik drauf schaun, dass ma mitanaund an Weg findn in a schenare Wöd.

Übersetzt von Gerhard Hager